சட்டத்தரணிகளுக்கு பாதுகாப்பு இல்லாவிட்டால் எவருக்குமே பாதுகாப்பு இருக்காது. எனவே, அரசாங்கம் சட்டத்தரணிகளின் பாதுகாப்பை உறுதி செய்யும் ‘லக்சம்பர்க் உடன்படிக்கை’ இனை விரைந்து நடைமுறைப்படுத்த வேண்டுமென ஐக்கிய தேசிய கட்சி வலியுறுத்தியுள்ளது.
மேலும்,நாட்டில் நிலவும் சட்டம் ஒழுங்கு சீர்குலைவிற்குப் பொறுப்பேற்று பொது பாதுகாப்பு அமைச்சர் ஆனந்த விஜேபால உடனடியாகப் பதவி விலக வேண்டும் என்றும் ஐக்கிய தேசிய கட்சியின் அறிக்கையில் சுட்டிக்காட்டப்பட்டுள்ளது.
அக்கட்சி விடுத்துள்ள அறிக்கையில், “கடந்த பெப்ரவரி 13 ஆம் திகதி பகல் பொழுதில் சட்டத்தரணி புத்திக மல்லவாரச்சி மற்றும் அவரது மனைவி சுட்டுக் கொல்லப்பட்ட சம்பவம், இலங்கையின் நீதித்துறை மற்றும் சட்டம் ஒழுங்கின் மீது விழுந்த பலத்த அடியாகப் பார்க்கப்படுகிறது.
-
சட்டம் ஒழுங்கு சீர்குலைவு: இலங்கையில் அதிகரித்து வரும் கொலைச் சம்பவங்கள் மற்றும் குறிப்பாக சட்டத்தரணிகள் இலக்கு வைக்கப்படுவது நீதித்துறையின் நேர்மையை பாதிக்கும் என அக்கட்சி கவலை தெரிவித்துள்ளது.
-
பொலிஸாரின் ஒருதலைப்பட்ச போக்கு: முறையான விசாரணைக்கு முன்னரே இது ஒரு திட்டமிட்ட குற்றச்செயல் என காவல்துறை அறிவித்திருப்பது மற்றும் காவல்துறையின் அரசியல்மயமாக்கல் ஆகியவை பாரபட்சமற்ற விசாரணை நடக்குமா என்ற ஐயத்தை எழுப்புகிறது.
என குறிப்பிட்டுள்ளதுடன் கீழ்வரும் வேண்டுகோள்களையும் முன்வைத்துள்ளது.
-
பதவி விலகல்: நாட்டில் நிலவும் சட்டம் ஒழுங்கு சீர்குலைவிற்குப் பொறுப்பேற்று பொது பாதுகாப்பு அமைச்சர் ஆனந்த விஜேபால உடனடியாகப் பதவி விலக வேண்டும்.
-
முறையான விசாரணை: சட்டமா அதிபர் மற்றும் காவல்துறை மா அதிபர் இணைந்து, இலங்கை சட்டத்தரணிகள் சங்கத்தின் இணக்கப்பாட்டுடன் ஒரு விசேட விசாரணைக் குழுவை நியமிக்க வேண்டும்.
-
சட்டப் பாதுகாப்பு: சட்டத்தரணிகளின் பாதுகாப்பை உறுதி செய்யும் ‘லக்சம்பர்க் உடன்படிக்கை’ (Luxemburg Convention) மற்றும் பொதுநலவாய சங்கத்தின் பரிந்துரைகளை இலங்கை அரசு நடைமுறைப்படுத்த வேண்டும்.
சட்டத்தரணி பாதுகாக்கப்படாவிட்டால் எவருமே பாதுகாக்கப்பட மாட்டார்கள் என்பதை வலியுறுத்தி, சட்டத்தரணிகளின் பாதுகாப்புக்காக ஐக்கிய தேசியக் கட்சி முன்னிற்கும்” என தெரிவிக்கப்பட்டுள்ளது.
