இலங்கையின் கருவாடு உற்பத்தியின் தரத்தை உயர்த்தி, சர்வதேச சந்தைக்கு ஏற்றவாறு மேம்படுத்தும் நோக்கில், கடற்றொழில், நீரியல் மற்றும் கடல் வளங்கள் அமைச்சு விசேட கலந்துரையாடலை நடத்தியது. பிரதி அமைச்சர் ரத்ன கமகே தலைமையில் அமைச்சு கேட்போர் கூடத்தில் நடைபெற்ற இச்சந்திப்பில், ஏற்றுமதியாளர்கள், பதப்படுத்துபவர்கள், உற்பத்தியாளர்கள் மற்றும் விநியோகஸ்தர்கள் கலந்து கொண்டனர்.
ஐரோப்பா, கனடா மற்றும் அவுஸ்திரேலியா போன்ற உயர்தர சந்தைகளுக்கு ஏற்றுமதி செய்யப்படும் கருவாடுகளின் தரப் பிரச்சினைகளைத் தீர்ப்பது இந்தக் கலந்துரையாடலின் முக்கிய நோக்கமாக இருந்தது. உள்நாட்டில் உயர்தர கருவாடு பெறுவதில் உள்ள சிரமங்கள் மற்றும் நீர்கொழும்பு போன்ற பகுதிகளில் உற்பத்தியின்போது காணப்படும் தரக் குறைபாடுகள் குறித்து விரிவாக ஆராயப்பட்டது.
பிரதி அமைச்சர் ரத்ன கமகே, “இறக்குமதி செய்யும் நாடுகளின் தரநிலைகளைப் பூர்த்தி செய்யும் உயர்தர கருவாடு உற்பத்தியை உருவாக்கி, ஏற்றுமதி சந்தையை வலுப்படுத்துவதே எமது இலக்கு,” என வலியுறுத்தினார். இதற்காக, நவீன தொழில்நுட்பங்களை அறிமுகப்படுத்துதல், ஐரோப்பிய ஒன்றியத் தரத்திற்கு ஏற்ற தொழிற்சாலைகளை தனியார் துறையுடன் இணைந்து நிறுவுதல் மற்றும் நீர்கொழும்பு உள்ளிட்ட பகுதிகளில் உற்பத்தி தரத்தை மேம்படுத்துதல் ஆகிய நடவடிக்கைகள் முன்னெடுக்கப்படும் என அவர் தெரிவித்துள்ளார்.
உற்பத்தியாளர்கள் உயர்தர கருவாடு உற்பத்திக்கு ஒத்துழைப்பு வழங்குவதாக உறுதியளித்தனர். இந்த ஒருங்கிணைந்த முயற்சியின் மூலம், இலங்கையின் கருவாட்டுத் தொழிற்துறையை சர்வதேச அளவில் போட்டித்தன்மை வாய்ந்ததாக மாற்ற கடற்றொழில் அமைச்சு திட்டமிட்டுள்ளது.
