தமிழக முதல்வர் மு.க. ஸ்டாலின் தலைமையிலான அரசாங்கம் இலங்கை மக்களின் பொருளாதார நெருக்கடியை கருத்திற் கொண்டு அரிசி, குழந்தைகளுக்கான பால்மா, உயிர்காக்கும் மருந்து வகைகள் ஆகியவற்றின் இரண்டாவது தொகுதி கடந்த வாரம் இலங்கையை வந்தடைந்துள்ளது. அதற்காக தமிழக அரசுக்கு நன்றி தெரிவித்துக் கொள்வதோடு, கிடைக்கப்பெற்ற நிவாரணப் பொருட்கள் எந்த விதமான பாரபட்சமுமின்றி அனைத்து மக்களுக்கும் நேர்மையான முறையில் வழங்கப்பட வேண்டும் என தொழிலாளர் தேசிய சங்கத்தின் நிதிச் செயலாளரும், மத்திய மாகாண சபை முன்னாள் உறுப்பினருமான சோ. ஸ்ரீதரன் தெரிவித்துள்ளார்.
இது தொடர்பாக அவர் கருத்து தெரிவிக்கையில்,
தமிழக அரசின் முதலாவது தொகுதி நிவாரணப் பொருட்கள் கடந்த மாதம் வந்தடைந்த நேரத்தில் மலையக மக்களுக்கு சரியான முறையில் வழங்கப்படவில்லை என்ற குற்றச்சாட்டும் எழுந்திருந்தது. இப்போது வந்துள்ள இரண்டாவது தொகுதியில் அத்தகைய குறைபாடுகள் எதுவுமின்றி சரியான முறியில் பகிர்ந்தளிக்க நடவடிக்கை எடுக்கப்பட வேண்டும்.
அத்தோடு, தமிழக அரசியின் நிவாரணப் பொருட்களை வழங்கும் போது பதுளை மாவட்டத்தில் உள்ள சில பிரதேசங்களில் வாகனப் போக்குவரத்துச் செலவுக்காக சாதாரண மக்களிடம் தலா 50 ரூபா வீதம் வசூலிக்கப்பட்டுள்ளதாக சமூக வலைத்தளங்களில் செய்திகள் வெளியாகிருந்தன. இது வேதனைக்குரிய விடயம் ஆகும். சாதாரண மக்களின் ஏழ்மை நிலையை அறிந்து நிவாரணம் வழங்குவதற்காக இலவசமாக வழங்கப்பட்டுள்ள பொருட்களுக்கு “வாகனச் செலவு” என்று கூறி பணம் அறவிட்டுள்ளமை கண்டிக்கத் தக்க விடயம் ஆகும். இவ்வாறு செயற்பட்டவர்களுக்கு எதிராக நடவடிக்கை எடுக்கப்பட வேண்டும்.
மேலும், ஒரு சிலரின் சமூக விரோதச் செயல்கள் ஊடாக மலையகத்துக்கு தலைகுனிவு ஏற்பட்டுள்ளதோடு, தமிழக அரசுக்கும் அவப்பெயரை ஏற்படுத்தி விடும் என்பதை உணர்ந்து கொள்ள வேண்டும். எனவே, இலவசமாக வழங்கபப்டும் பொருட்களை இலவசமாகவே விநியோகிப்பதில் கவனம் செலுத்த வேண்டும். சிலரின் தான்தோன்றித் தனமான செயற்பாடுகள் மூலம் மக்களுக்கு கிடைக்க வேண்டிய நிவாரணங்கள் கிடைக்காமல் போகக் கூடிய வாய்ப்புகளும் ஏற்பட்டால் அது எமது சமூத்துக்கு பெரும் இழப்பை ஏற்படுத்தும் என்பதையும் உணர்ந்து கொள்ள வேண்டும் என்றும் தெரிவித்துள்ளார்.
