அரசு அலுவலகங்களில் பணிபுரியும் அரசு ஊழியர்கள் காலை 8.30 மணி முதல் மாலை 4.15 மணி வரை அலுவலகங்களில் தங்கி பணியை செய்ய வேண்டும். அரச நிர்வாகம், உள்நாட்டலுவல்கள், மாகாண சபைகள் மற்றும் உள்ளூராட்சி அமைச்சு வர்த்தமானி மூலம் இதனைத் தெரிவித்துள்ளதாக தெரிவிக்கப்படுகின்றது.
சில அரச நிறுவனங்களின் உத்தியோகத்தர்கள் மற்றும் ஊழியர்கள் உரிய காலத்தை மதிக்காமல் பணிக்கு வந்து செல்வதை அவதானித்ததன் காரணமாகவே இந்த முடிவு எடுக்கப்பட்டுள்ளது. வர்த்தமானியின்படி, பண பரிவர்த்தனைக்காக அரசு அலுவலகங்கள் பிற்பகல் 3.00 மணி வரை திறந்திருக்க வேண்டும்.
இது தவிர, சீருடைப் படிகள் பெறும் அனைத்து அரசு அலுவலர்களும் பணியின் போது தங்களது அலுவலக அடையாள அட்டையை அணிவது கட்டாயமாக்கப்படும்.
பொது தினமாக ஒதுக்கப்பட்டுள்ள திங்கட்கிழமையன்று கீழ்மட்ட அதிகாரி முதல் அமைச்சின் செயலாளர் வரை அனைத்து மட்ட அதிகாரிகளும் அலுவலகத்தில் கடமையில் இருக்கவேண்டியது அவசியம் எனவும் அந்த வர்த்தமானியில் தெரிவிக்கப்பட்டுள்ளது.
அன்றைய தினம் நோய் அல்லது தவிர்க்க முடியாத சூழ்நிலைகள் தவிர வேறு காரணங்களுக்காக விடுமுறையை அங்கீகரிக்காமல் இருக்க நிறுவனத் தலைவர் பார்த்துக்கொள்ள வேண்டும்.
அனைத்து அரசு நிறுவனங்களிலும், விசாரணை சாளரங்கள், பணம் ஏற்றுக்கொள்ளும் சாளரங்கள், விண்ணப்ப சாளரங்கள் தொடர்ந்து திறந்திருக்க வேண்டும்.
இதன்படி, வேலை நேரத்தில் வேறு தனிப்பட்ட நடவடிக்கைகளுக்காக வெளியில் செல்லக் கூடாது எனவும், மாற்றுத்திறனாளிகள் அலுவலகங்களுக்குச் செல்வதற்குத் தேவையான வசதிகளை செய்து கொடுக்க நடவடிக்கை எடுக்க வேண்டும் எனவும் குறித்த வர்த்தமானியி மேலும் தெரிவிக்கப்பட்டுள்ளது.
நாளாந்தம் பொதுமக்களிடம் இருந்து கிடைக்கப்பெறும் முறைப்பாடுகளை கருத்திற்கொண்டு இந்த வர்த்தமானியை வெளியிட நடவடிக்கை எடுக்கப்பட்டுள்ளதாக தெரிவிக்கப்படுகின்றது.
