சுற்றுலா இலங்கை – அவுஸ்திரேலிய A கிரிக்கெட் அணிகள் இடையில் ஒழுங்கு செய்யப்பட்ட ஒருநாள் தொடரின் இரண்டாவது போட்டியில் இலங்கை A 51 ஓட்டங்களால் வெற்றி பெற்றுள்ளது.
இலங்கை A கிரிக்கெட் அணியின் அவுஸ்திரேலிய சுற்றுப்பயணத்தில் மூன்று போட்டிகள் கொண்ட ஒருநாள் தொடர் நடைபெற்று வருகின்றது. தொடரின் முதல் போட்டியில் அவுஸ்திரேலிய A அணி வென்று தொடரில் 1-0 என முன்னிலை அடைந்திருக்க இரண்டாவது போட்டி இன்று (06) டார்வினில் ஆரம்பமாகியது.
போட்டியின் நாணயச் சுழற்சியில் வென்ற அஸ்திரேலிய A அணி வீரர்கள், இலங்கையை முதலில் ஆடப்பணித்தனர்.
அதன்படி முதலில் துடுப்பாடிய இலங்கை A அணி 7 விக்கெட்டுக்களை இழந்து 294 ஓட்டங்கள் பெற்றது. இலங்கை A தரப்பில் நுவனிது பெர்னாண்டோ 82, லசித் குரூஸ்புள்ளே 63 ஓட்டங்கள் எடுத்தார்.
அவுஸ்திரேலிய A பந்துவீச்சில் ஜேக் நிஸ்பாத் மற்றும் சேம் எலியட் ஆகியோர் தலா 2 விக்கெட்டுக்களைச் சாய்த்தனர்.
பின்னர் போட்டியின் வெற்றி இலக்காக நிர்ணயம் செய்யப்பட்ட 295 ஓட்டங்களை அடைய பதிலுக்கு ஆடிய அவுஸ்திரேலிய A தரப்பு 41.1 ஓவர்களில் அனைத்து விக்கெட்டுக்களையும் இழந்து 243 ஓட்டங்களையே எடுத்தது.
அவுஸ்திரேலிய A தரப்பின் துடுப்பாட்டத்தில் அதிகபட்சமாக மெதிவ் ரேன்சாவ் சதம் தாண்டி 106 ஓட்டங்கள் எடுத்தார்.
இலங்கை A அணியின் வெற்றியை உறுதி செய்த அதன் பந்துவீச்சில் ப்ரமோத் மதுசான் 4 விக்கெட்டுக்கள் சாய்க்க, மொஹமட் சிராஸ், சஹான் ஆராச்சிகே மற்றும் துஷான் ஹேமன்த தலா 2 விக்கெட்டுக்கள் வீதம் சுருட்டியமை குறிப்பிடத்தக்கது.
