பையா, கருங்காலி, வி3 உள்பட பல படங்களில் வில்லன் கதாபாத்திரங்களில் நடித்த பொன்முடி திருமலைசாமி இயக்கும் படம், ‘பிஎம்டபிள்யூ 1991’.
இதில் பொன்முடியுடன் மணிமேகலை, சிறுவன் கவுதம், சாப்ளின் பாலு ஆகியோர் நடித்துள்ளனர். கிரீன் விஸ் சினிமா சார்பில் வில்வங்கா தயாரித்துள்ள இந்தப் படம் பல சர்வதேச திரைப்பட விழாக்களில் 22 விருதுகளைப் பெற்றுள்ளது.
படம் பற்றி பொன்முடி திருமலைசாமி கூறும்போது, “உலகம் முழுவதும் உள்ள அனைத்து மனிதர்களுக்கும் பொதுவான ஒன்று சைக்கிள். ஒரு காலத்தில் அதை வைத்திருப்பதே கவுரவமாகப் பார்க்கப்பட்டது. ஒரு காருக்கு நிகராக அதை பலர் கருதினார்கள். அதை மையப்படுத்தித் தான் இதன் கதையை உருவாக்கினேன். இந்தப் படத்தை திரையரங்குகளில் வெளியிடும் பணிகள் நடந்து வருகின்றன” என்றார்.
