நாட்டின் பொருளாதார சீரற்ற நிலைமை காரணமாக பெருந்தோட்ட மக்கள் ஏனைய மக்களை விட பெரிதும் பாதிப்படைந்துள்ளனர் என்று தொழிலாளர் தேசிய சங்கத்தின் பிரதி நிதிச் செயலாளரும் மத்திய மாகாண சபையின் முன்னாள் உறுப்பினருமான சோ.ஸ்ரீதரன் தெரிவித்தார்.
தொழிலாளர் தேசிய சங்கத்தின் பொகவந்தலாவை பிரதேச தோட்டக் கமிட்டி தலைவர்களுக்கான கூட்டத்தில் கலந்து கொண்டு பேசிய போதே இவ்வாறு அவர் தெரிவித்தார்.
இந்தக் கூட்டத்தில் அவர் தொடர்ந்து பேசுகையில் கூறியதாவது:
தற்போதைய அரசாங்கத்தின் முறையற்ற பொருளாதாரக் கொள்கை மற்றும் நிர்வாக செயற்பாடு காரணமாக எமது நாடு வங்குரோத்து நிலையை அடைந்துள்ளது. எரிப்பொருட்களுக்கும் அத்தியாவசியப் பொருட்களுக்கும் என்றுமில்லாதளவு தட்டுப்பாடு ஏற்பட்டுள்ளது. இதனால் நாட்டு மக்கள் அனுதினமும் வீதியில் இறங்கி போராட வேண்டிய நிலைமை ஏற்பட்டுள்ளது.
இவ்வாறானதொரு நிலையில் எத்தகைய வருமானமுமின்றி வாழ்கின்ற பெருந்தோட்டத் தொழிலாளர்களும் அவர்களைச் சார்ந்த குடும்பத்தினரும் ஏனையவர்களும் பல்வேறு அசௌகரியங்களை எதிர்நோக்கி வருகின்றனர்.
தோட்டத் தொழிலாளர்கள் குறைந்த வருமானத்தையே தற்போது பெற்று வருகின்றனர்.
அந்த வருமானத்தைக் கொண்டு தற்போதைய வாழ்க்கைச் செலவை ஈடுசெய்ய முடியாது தத்தளிக்கின்றனர்.
தோட்டத் தொழிலாளர்களுக்கு கோதுமை மா நிவாரணம் வழங்கப்படுவதாக கூறப்பட்ட போதும் தற்போது அந்த நிவாரணம் இடை நிறுத்தி வைக்கப்பட்டுள்ளது.
மலையகத்தில் போலியான அபிவிருத்தியே இடம்பெறுகின்றது.
இன்றைய முறையற்ற அரசாங்கத்துக்கு எதிராக நாட்டு மக்கள் அணிதிரண்டு போராடி வருகின்றனர்.
அந்த வகையில் எதிர்வரும் ஏப்ரல் மாதம் மூன்றாம் திகதி தமிழ் முற்போக்கு கூட்டணி ஏற்பாட்டில் தலவாக்கலையில் மாபெரும் மக்கள் பேரணி ஒன்றை ஏற்பாடு செய்துள்ளோம்.
இந்தப் பேரணி மூலமாக அரசாங்கத்துக்கு எமது எதிர்ப்பை வெளிப்படுத்துவோம்.
