தமக்கு சொந்தமான பஸ்ஸை கொழும்பு -மொனராகலை வீதியில் இயக்குவதற்கான அனுமதிபத்திரம் பெறுவதற்காக போக்குவரத்து அதிகார சபை அதிகாரி ஒருவருக்கு லஞ்சம் வழங்கியதாக பெக்கோ சமன் வாக்கு மூலம் அளித்துள்ளதாக அதிகாரிகள் தெரிவிக்கின்றனர்.
ஊவ மாகாண பயணிகள் போக்குவரத்து அதிகார சபையின் முன்னாள் தலைவருக்கே இவ்வாறு மாதாந்தம் மூன்று லட்சத்து 50 ஆயிரம் ரூபாய் லஞ்சம் வழங்கியதாக அவர் தமது வாக்குமூலத்தில் தெரிவித்துள்ளார்.
இதனை அடுத்து குறித்த அதிகாரியிடம் வாக்குமூலம் பெறுவதற்காக அவர் குற்றத் தடுப்பு பிரிவுக்கு அழைக்கப்பட உள்ளார் என கூறப்படுகிறது.
தற்போது மேல் மாகாண வடக்கு குற்றப்பிரிவினரால் தடுத்து வைக்கப்பட்டு விசாரிக்கப்பட்டு வரும் ‘பெக்கோ சமன்’ தமக்கு சொந்தமான 8 கோடிக்கும் அதிக பெறுமதி உள்ள இரண்டு சொகுசு பஸ்களை கண்டறியும் வகையில் கடந்த நாட்களில் குற்ற பிரிவு அதிகாரிகளுக்கு தகவல்களை வழங்கி இருந்தார்.
குறித்த இரண்டு பஸ்களில் ஒன்றை கொழும்பு -மொனராகலை வீதியில் இயக்க லஞ்சம் வழங்கியதாக தற்போது குறிப்பிட்டுள்ளார்.
குறித்த அனுமதி பத்திரம் கடந்த மார்ச் மாதம் காலாவதியான போதும் அதனை தான் பார்த்துக் கொள்வதாக அதிகாரி தெரிவித்ததாக அவர் மேலும் குறிப்பிட்டுள்ளார்.
பெக்கோ சமன் கைது செய்யப்பட்டதன் பின்னர் அவரது மைத்துனர் குறித்த கொடுக்கல் வாங்கல்களை மேற்கொண்டதாக தெரியவந்துள்ளது.
குறித்த அதிகாரி பதவி இழந்த பின்னரும் தான் அவருக்கு பணம் வழங்கியதாக பெக்கோ சமன் தெரிவித்துள்ளார்.
