முன்னாள் ஜனாதிபதி ரணில் விக்ரமசிங்க நாட்டை மீட்டெடுத்தார் என்று சொல்வதில் உண்மையில்லை என ஜே.வி.பியின் செயலாளர் டில்வின் சில்வா தெரிவித்தார்.
நாம் ஆட்சிக்கு வந்து கடந்துவிட்ட ஒரு வருடம் குறித்தும், அதற்கு பிற்பட்ட காலம் குறித்தும் இலங்கையர்கள் மத்தியில் பலதரப்பட்ட நிலைப்பாடுகள் உள்ளன. தோல்வியுற்ற எதிர்க்கட்சிகள் எவ்வேளையிலும் நாங்கள் வீழ்ந்துவிட வேண்டும் என்று பிரார்த்திக் கொண்டிருக்கிறார்கள்.
எங்களுடைய ஆதரவாளர்களும் அரசாங்கத்தின் வேகம் போதுமானது அல்ல என்ற நிலைப்பாட்டில் உள்ளனர். ஆனால்,நாங்கள் ஒரு நோக்கத்திற்காக செயலாற்றுகிறோம். திட்டமிடலுடக் பணியாற்றுகிறோம். படிப்படியாக செயலாற்றுகிறோம். நாம் எமது இலக்கான புதிய சமுதாய உருவாக்கத்தை நோக்கி நகரப்போவதும் உறுதி.
இலங்கையில் ஆட்சி சரிந்துவிடும் என்று எவர் கங்கணம் கட்டிக்கொண்டிருந்தாலும் அது நடக்காது. நாம் பொறுப்பேற்கும் போதும் இந்த நாடு உத்தியோகபூர்வமாக வங்குரோத்து நாடு என்று அறிவிக்கப்பட்டிருந்தது. பெற்றுக்கொண்ட வௌிநாட்டு கடன்களை செலுத்துவதை நிறுத்தி வைத்திருந்த நாடு.
இவ்வாறிருக்க சிலர் ரணில் விக்ரமசிங்க இந்த நாட்டை நெருக்கடியிலிருந்து மீட்டதாக கூறுகிறார்கள். அந்த நெருக்கடியை மக்கள் மீது சுமத்துவதையே ரணில் விக்ரமசிங்க செய்தார். ரணில் புதிதாக ஒன்றும் செய்யவும் இல்லை. சர்வதேச நாணய நிதியத்துடன் இணைந்து நாம் கடன் செலுத்தப்போவதில்லை என்ற தீர்மானத்தை எடுத்தார். அதனால் கடன் பெற்ற நாடுகளுக்கும் எமக்கும் முரண்பாட்டு நிலைமை ஏ்ற்படும்.
அதனை தீர்த்துக்கொள்ளவே இடைத் தரகராக சர்வதேச நாணய நிதியம் செயலாற்றியது. ரணில் அவரது காலத்தில் அடுத்த இரு வாரங்கள் மிகக் கடுமையாக இருக்கும் என்பதையே கூறிக்கொண்டிருந்தார். தொங்கு பாலத்தில் செல்ல வேண்டும் என்பதையே அவர் நிரந்தரமாக கூறி வந்தார். 2048 களிலியே நாம் பொருளாதார ரீதியாக முன்னேற முடியும் என்றும் அவர் கூறிவந்தார். கடனிலிருந்து மீண்டு வர நாட்டின் சில நிறுவனங்களை விற்றுத்தள்ள வேண்டுமென கூறினார்.
ஆனால் நாங்கள் விற்பனை செய்யவும் இல்லை. தொங்கு பாலத்தில் செல்லவும் இல்லை, மக்கள் மீது சுமைகளை சுமத்தவும் இல்லை ஆனால் படிப்படியாக நெருக்கடியிலிருந்து மீண்டு வந்தோம்.
