Air Canada விமான நிறுவனத்தின் முன்னாள் கேப்டன் ஒருவர், அதற்குரிய பிரதான உரிமம் (Licence) இன்றி நூற்றுக்கணக்கான விமானங்களை இயக்கியுள்ளதாக Greater Toronto Area பொலிஸார் அதிர்ச்சித் தகவலை வெளியிட்டுள்ளனர்.
இது தொடர்பான “Project Icarus” என்றழைக்கப்படும் சிக்கலான மோசடி விசாரணை விபரங்களை, Peel Regional Police செவ்வாய்க்கிழமை காலை ஊடகவியலாளர் சந்திப்பில் வெளியிடவுள்ளனர்.
இந்தச் சம்பவத்தால் பயணிகளின் பாதுகாப்பிற்கு எந்த அச்சுறுத்தலும் ஏற்படவில்லை என Air Canada உறுதியளித்துள்ளது.
சம்பந்தப்பட்ட நபர் முறையான வணிக ரீதியான விமான ஓட்டுநர் உரிமம் (Commercial Pilot Licence) பெற்றவர் என்றும், பயிற்சிகளில் தேர்ச்சி பெற்றவர் என்றும் நிறுவனம் கூறியுள்ளது.
எனினும், கனடாவில் பெரிய விமானங்களின் கேப்டனாகப் பணிபுரிய அவசியமான, எழுத்துமூல தேர்வுகள் மூலம் பெறப்படும் Airline Transport Pilot Licence (ATPL) அவரிடம் இல்லை என்பது கண்டறியப்பட்டுள்ளது.
இந்தத் தவறைத் தொடர்ந்து, அந்த நபர் பணியில் இருந்து நீக்கப்பட்டு, இந்த விவகாரம் Transport Canada அமைப்பிற்குப் முறைப்பாடு செய்யப்பட்டுள்ளது.
இது குறித்த மேலதிக விசாரணைகள் தொடர்ந்து நடைபெற்று வருவதாக Air Line Pilots Association தெரிவித்துள்ளது.
