கனடாவின் (Canada) றொரண்டோ (Toronto) நகரில் அமைந்துள்ள புகழ்பெற்ற ‘Hospital for Sick Children’ (SickKids) மருத்துவமனையைச் சேர்ந்த மருத்துவர் ஒருவர் மீது, இணையவழி சிறுவர் பாலியல் துஷ்பிரயோகப் பொருட்களை (Child sexual abuse material) அணுகியதாகவும், கைவசம் வைத்திருந்ததாகவும் குற்றம் சாட்டப்பட்டு வழக்குப்பதிவு செய்யப்பட்டுள்ளது.
கடந்த ஜனவரி 2026-இல் றொரண்டோ பொலிஸாரின் ‘Internet Child Exploitation’ (ICE) பிரிவினர் தொடங்கிய விசாரணையைத் தொடர்ந்து, பிப்ரவரி 2026-இல் SickKids மருத்துவமனை மற்றும் சந்தேகநபரின் வீட்டில் சோதனைகள் நடத்தியது.
அதன்போது, அவரது தொழிலுக்காக பயன்படுத்தும் கணினி உள்ளிட்ட மின்னணு சாதனங்கள் பறிமுதல் செய்யப்பட்டன.
இதனைத் தொடர்ந்து, ஜூலை 21 செவ்வாய்க்கிழமை அன்று Dr. Dilan Dissanayake (வயது 44) என்ற மருத்துவர் றொரண்டோ பொலிஸாரால் கைது செய்யப்பட்டார்.
இந்தச் சட்டவிரோதப் பொருட்கள் அவரது மருத்துவப் பயிற்சியுடன் (medical practice) தொடர்புடையவை என்பதற்கான எந்த ஆதாரமும் இதுவரை கிடைக்கவில்லை எனப் புலனாய்வாளர்கள் தெரிவித்துள்ளனர்.
இந்தச் சம்பவம் குறித்துக் ஆழ்ந்த கவலையும் அதிர்ச்சியும் தெரிவித்துள்ள SickKids மருத்துவமனை நிர்வாகம், விசாரணை குறித்துத் தெரிந்தவுடனேயே குறித்த மருத்துவரை உடனடியாக விடுப்பில் (immediate leave) அனுப்பியதாகத் தெரிவித்துள்ளது.
மேலும், நோயாளிகளின் பாதுகாப்பிற்கு எந்தப் பாதிப்பும் இல்லை என்றும், கவலையடையும் நோயாளிகளின் குடும்பத்தினர் patient.relations@sickkids.ca என்ற மின்னஞ்சலில் தொடர்புகொள்ளலாம் என்றும் அறிவித்துள்ளது.
