திறைசேரியிலிருந்து காணாமல் போயுள்ளதாகக் கூறப்படும் 2.5 மில்லியன் அமெரிக்க டொலர் நிதியை மீண்டும் கண்டுபிடிக்க முடியாமல் போனால், அந்த நட்டத்தை இறுதியாக இந்த நாட்டு மக்களே சுமக்க நேரிடும் என அரசாங்க நிதி பற்றிய குழுவில் (COPF) தெரியவந்துள்ளது.
நாடாளுமன்ற உறுப்பினர் ஹர்ஷ டி சில்வா தலைமையிலான அரசாங்க நிதி பற்றிய குழுவின் முன்னிலைக்கு, மகா திறைசேரியின் செயலாளர், மத்திய வங்கி ஆளுநர் உள்ளிட்ட உயர் அதிகாரிகள் அழைக்கப்பட்டிருந்த போதே இந்த விடயங்கள் வெளிச்சத்திற்கு வந்துள்ளன.
“காணாமல் போன இந்த நிதியை கண்டுபிடிக்க முடிந்தால் அதனை செலுத்த முடியும். ஆனால் அவ்வாறு செய்ய முடியாவிட்டால், எஞ்சிய தொகை மக்கள் மீது சுமத்தப்படும்” என்று நிதி அமைச்சின் செயலாளர் ஹர்ஷன சூரியப்பெரும தெரிவித்ததாக குழுவின் தலைவர் ஹர்ஷ டி சில்வா குறிப்பிட்டார்.
இந்த நட்டத்தை ஈடுசெய்வதற்காக வரவு செலவுத் திட்ட திருத்தம் (Budget Amendment) ஒன்றைக் கூட சமர்ப்பிக்க வேண்டி ஏற்படும் என்றும் ஹர்ஷ டி சில்வா வலியுறுத்தியுள்ளார்.
மத்திய வங்கியின் நிலைப்பாடு
இந்த நிதி மோசடி தொடர்பில் மத்திய வங்கி கணிசமான பொறுப்பை ஏற்க வேண்டும் என அறிக்கைகளில் குறிப்பிடப்பட்டுள்ள போதிலும், மத்திய வங்கி அதிகாரிகள் அது குறித்து மாற்றுக்கருத்தைக் கொண்டிருப்பதாக குழுவின் முன்னிலையில் தெரிவித்துள்ளனர்.
தொடர்புடைய அறிக்கை தமக்கு கிடைக்கவில்லை என மத்திய வங்கி கூறியதால், அன்றைய தினமே அந்த அறிக்கை அவர்களுக்கு வழங்கப்பட்டதாகவும், அது குறித்து ஒரு வாரத்திற்குள் பதில் அறிக்கை வழங்குவதாக அவர்கள் உறுதியளித்துள்ளதாகவும் ஹர்ஷ டி சில்வா தெரிவித்தார்.
மின்னஞ்சல் ஊடாக நடந்த மோசடி மற்றும் சைபர் பாதுகாப்பு குறைபாடுகள்
இந்த நிதி மோசடி மின்னஞ்சல் (Email) பரிமாற்றங்கள் ஊடாக நடந்துள்ளதுடன், அரசாங்கத்தின் மிக முக்கிய நிறுவனம் ஒன்று ஐந்து வருடங்களாக எந்தவித தொழில்நுட்ப ஆதரவும் இல்லாத மின்னஞ்சல் சேவையகம் (Email Server) ஒன்றை பயன்படுத்தி வந்தமை குறித்து குழுவின் தலைவர் தனது பலத்த ஆச்சரியத்தை வெளியிட்டார்.
இவ்வாறான ஆபத்தான சூழ்நிலையில், சைபர் பாதுகாப்பு (Cyber Security) குறித்து கடுமையான பிரச்சினைகள் எழுவதாகவும் அவர் குறிப்பிட்டார்.
தற்போதைய விசாரணைகள்
இந்தச் சம்பவம் தொடர்பில் தற்போது குற்றப் புலனாய்வுத் திணைக்களமும் (CID) பொலிஸாரும் விசாரணைகளை மேற்கொண்டு வருவதுடன், தடயவியல் தணிக்கை (Forensic Audit) ஒன்றும் முன்னெடுக்கப்பட்டு வருகின்றது.
நிறுவனத்திடம் முறையான வழிகாட்டுதல் அமைப்பு (Guidelines System) இல்லாததன் காரணமாக, பொறுப்பை ஒருவர் மீது ஒருவர் சுமத்துவதற்கான வாய்ப்பு உருவாகியுள்ளதாகவும் இக்குழுவில் மேலும் கலந்துரையாடப்பட்டது.
இது ஒரு பாரிய அளவிலான நிதி மோசடி எனவும், ஏற்பட்டுள்ள தவறை திருத்தி பொறுப்பானவர்களை அடையாளம் காண நடவடிக்கை எடுக்கப்பட வேண்டும் எனவும் ஹர்ஷ டி சில்வா வலியுறுத்தினார். madawalaenews
